“Su ehtiyatlarından və elektrik enerjisindən səmərəli istifadə” mövzusunda növbəti maarifləndirmə məktəblilərlə təşkil olunub

Oktyabrın 24-də Daşkəsən Rayon İcra Hakimiyyəti Daşkəsən Su Meliorasiya Sistemlərinin İstismarı İdarəsi, “Daşkəsən” Elektrik Şəbəkəsi və rayon üzrə Təhsil Sektoru ilə birgə Yuxarı Daşkəsən qəsəbə Z.Bağırov adına tam orta məktəbdə “Su ehtiyatlarından və elektrik enerjisindən səmərəli istifadə” mövzusunda növbəti maarifləndirici görüş keçirib.

Giriş nitqi ilə çıxış edən Daşkəsən Rayon İcra Hakimiyyətinin məsul əməkdaşı Elmin Paşayev diqqətə çatdırıb ki, tədbir “Azərbaycan Respublikasında 2024-cü  ilin “Yaşıl dünya naminə həmrəylik ili” elan edilməsi ilə bağlı Tədbirlər Planı”nın 4.4-cü və 4.8-ci bəndlərinin icrası məqsədi daşıyır.

Görüşdə məktəblilərə “Su probleminin yaranma səbəbləri”, “İqlim dəyişmələrinin su ehtiyatlarına təsiri”, “Maarifləndirmə: amalımız – sudan qənaətlə istifadədir!”, “Yaşıl enerji”, “Məişətdə elektrik enerjisindən qənaətlə istifadə üsulları”, “Daşkəsən rayonunda sudan və elektrikdən səmərəli istifadəyə dair həyata keçirilən tədbirlər” mövzularında praktik məlumatlar çatdırılıb. Sudan və enerjidən düzgün istifadə etməklə təbii sərvətlərin tükənməsinin, israfçılığın və ekoloji problemlərin yaranmasının qarşısını almağa töhfə verəcəyimiz, eyni zamanda ailə büdcəmizə qənaət edə biləcəyimiz vurğulanıb.

Sonda şagirdlərin sualları cavablandırılıb və məlumatlandırıcı bukletlər paylanıb.