Daşkəsənli Vətən müharibəsi şəhidi Möhlət Abbasovun anım günü qeyd olunub

Noyabrın 9-da Daşkəsən Şəhidlər Xiyabanında Vətən müharibəsi şəhidi əsgər Abbasov Möhlət Eldəniz oğlunun şəhadətinin 4-cü ildönümü münasibətilə keçirilən mərasimdə Daşkəsən Rayon İcra Hakimiyyətinin başçısı Orxan Abbasov, rayonun hüquq-mühafizə orqanlarının, idarə, müəssisə və xidmət sahələrinin rəhbərləri, şəhidin ailə üzvləri, şəhid valideynləri, müharibə veteranları, sakinlər və ictimaiyyət nümayəndələri iştirak ediblər.

Ziyarətə gələnlər şəhidin məzarı üzərinə gül dəstələri düzüblər və dualar oxunub.

İcra başçısı Orxan Abbasov şəhidin ailəsinə başsağlığı verib, səbir diləyib. Qeyd edib ki, ölkə rəhbərliyi tərəfindən Daşkəsən rayonunda da şəhid ailələrinə, müharibə əlillərinə və iştirakçılarına yüksək səviyyədə diqqət və qayğı göstərilir, onların sosial müdafiəsinin gücləndirilməsi istiqamətində mütəmadi tədbirlər həyata keçirilir.

Digər çıxış edənlər Möhlət Abbasovla bağlı xatirələrini bölüşüblər, şəhid adının ucalığından, qəhrəmanlarımızın şanlı döyüş yolundan və şücaətindən söhbət açıblar.

Şəhidin anası Qönçə Cəfərova ailəsinə hər zaman göstərilən həssas münasibətə, övladının xatirəsinin yaşadılmasına görə Prezident cənab İlham Əliyevə və Birinci vitse-prezident hörmətli Mehriban xanım Əliyevaya təşəkkürünü bildirib.