DAŞKƏSƏNDƏ ORTA MƏKTƏBDƏ NARKOTİK ƏLEYHİNƏ MAARİFLƏNDİRMƏ TƏDBİRİ KEÇİRİLİB
Fevralın 3-də Daşkəsən Rayon Polis Şöbəsinin təşkilatçılığı ilə Daşkəsən şəhər İ.Nəsimi adına 1 nömrəli tam orta məktəbdə “Gəncliyimizi narkomaniyadan qoruyaq” mövzusunda təşkil olunan tədbirdə Daşkəsən Rayon İcra Hakimiyyətinin məsul işçisi, RPŞ-nin əməkdaşları, rayon Təhsil sektorunun aparıcı məsləhətçisi, məktəbin pedaqoji heyəti və yuxarı sinif şagirdləri iştirak ediblər.
Şagirdlərlə görüşdə çıxış edənlər narkotiklərin qanunsuz dövriyyəsinin cəmiyyətə və insanların sağlamlığına vurduğu zərərlərdən danışıb, bu sahədə hüquq-mühafizə orqanlarının, o cümlədən ictimaiyyətin apardığı qətiyyətli mübarizə haqqında ətraflı məlumat veriblər. Həmçinin “Ağ ölüm”lə mübarizədə və gənclərin zərərli vərdişlərdən uzaq tutulmasında maarifləndirmə işinin mütəmadi aparılmasının vacibliyini vurğulayıblar.
Tədbirin sonunda şagirdləri maraqlandıran suallar cavablandırılıb, narkomaniyanın fəsadlarından bəhs edən sosial çarxlar nümayiş etdirilib.
Elmar Əliyev – Vüqarlı
Daşkəsən RİHBA-nın İctimai-siyasi və
humanitar məsələlər şöbəsinin müdir müavini
