DAŞKƏSƏN RAYON İCRA HAKİMİYYƏTİNİN BAŞÇISI ƏHƏD ABIYEV “SON ZƏNG” TƏDBİRİNDƏ MƏZUNLARLA GÖRÜŞÜB

İyunun 14-də Daşkəsən rayonunun tam orta məktəblərində ənənəvi “Son zəng” tədbirləri təntənəli surətdə keçirilib.

Daşkəsən Rayon İcra Hakimiyyətinin başçısı Əhəd Abıyev “Son zəng” münasibətilə Daşkəsən şəhər A. Mürsəlov adına 2 nömrəli tam orta məktəbinin Rayon Heydər Əliyev Mərkəzinin qarşısında keçirilən tədbirində iştirak edib.

Dövlət Himninin səslənməsindən sonra Ulu öndər Heydər Əliyevin və ölkəmizin ərazi bütövlüyü uğrunda həlak olmuş şəhidlərimizin xatirəsinin yad edilməsi ilə başlayan tədbiri giriş sözü ilə RİH-nin başçısı Əhəd Abıyev açıb. O çıxışında deyib:

- Bu gün müstəqil respublikamız özünün inkişafına, dünya ölkələri arasındakı qalib dövlət kimi nüfuzuna görə xüsusilə seçilir. Ümummilli lider Heydər Əliyevin layiqli davamçısı möhtərəm Prezidentimiz, Müzəffər Ali Baş Komandan cənab İlham Əliyevin rəhbərliyi ilə xalqımızın bütün sahələr üzrə qazandığı parlaq qələbələr bizi sevindirir.

Prezident cənab İlham Əliyev və Birinci vitse-prezident hörmətli Mehriban xanım Əliyeva tərəfindən  xalqımızın gələcəyi olan uşaqlara və gənclərə göstərilən diqqət və qayğı, onların sağlam və bilikli böyüməsi istiqamətində həyata keçirilən işlər Daşkəsən rayonunda da öz əksini tapmışdır. Belə ki, son illərdə rayonda aparılan genişmiqyaslı abadlıq-quruculuq işləri çərçivəsində ən ucqar kəndlərdə yeni məktəb binaları tikilib, əsaslı təmir işləri aparılıb, modul tipli məktəblər quraşdırılıb. Prezident cənab İlham Əliyevin sərəncamı ilə bu günlərdə Daşkəsən şəhər Anar Mürsəlov adına 2 nömrəli tam orta məktəbin yeni binasının inşasına başlanılıb, ümumtəhsil müəssisələri lazımi avadanlıqla təchiz edilib və müəllim-pedaqoji heyətin məvacibləri artırılıb.

Bu gün bütün respublikamızda olduğu kimi rayonumuzun ümumtəhsil məktəblərindən 25 tam orta məktəbində 217 məzunumuz  üçün “Son zəng” çalınır. Sizlərlə bu “Son zəng” tədbirində iştirak etmək, sevincinizə şərik olmaq hamımızı fərəhləndirir.

Əziz məzunlar, Siz orta məktəbi başa vurmaqla, əslində, müstəqil həyata qədəm qoyursunuz. Hər biriniz bu gün orta məktəbi qazandığınız biliklərlə, unudulmaz təəssürat və xatirələrlə tərk edirsiniz. Artıq sizi müstəqil həyat gözləyir. Arzu edirəm ki, öz layiqli davranışınızla, parlaq gələcəyinizlə sizlərə bəslənən ümidləri doğruldacaq, valideynlərinizin, müəllimləriniz üzünü ağ edəcəksiniz.

Sizin hər birinizi bağrıma basır, bir daha da sizləri təbrik edir, gələcək həyatınızda yeni-yeni uğurlar və xoşbəxtlik arzulayıram.

“Son zəng” tədbirlərində şagirdlərin hazırladığı bir-birindən maraqlı ədəbi-bədii kompozisiyalar nümayiş olunub.

On birincilərin inamlı çıxışları, mənalı ürək sözləri gənclərin Vətənin layiqli övladları olacağına inamı daha da artırıb.

“Son zəng” çalındıqdan sonra "Bilik açarı"nı birincilərə təhvil verən məzunlar məktəblərə əlvida deyiblər.

Elmar ƏLİYEV

Daşkəsən RİHBA-nın İctimai-siyasi və

humanitar məsələlər şöbəsinin müdir müavini