DAŞKƏSƏN KOB DOSTU NÖVBƏTİ MAARİFLƏNDİRİCİ GÖRÜŞÜNÜ QARAQULLAR KƏNDİNDƏ KEÇİRİB
Noyabrın 18-də Daşkəsən KOB dostu Muraz Məmmədov Qaraqular kəndində sahibkarlar, həmçinin sahibkar olmaq istəyən gənclərlə ərazi görüşü keçirib.
Görüşdə Daşkəsən RİHBA-nın Sosial-iqtisadi inkişafın təhlili və proqnozlaşdırılması şöbəsinin müdir müavini Aidə Nağıyeva, ərazi icra nümayəndəsinin müavini və bələdiyyə sədri iştirak edib.
Görüşün məqsədi Daşkəsən rayonunda biznes savadlılığının artırılması, mövcud biznes imkanları və dəstək mexanizmləri barədə sahibkarların məlumatlandırılması və onların dinlənilməsidir.
Giriş nitqi ilə çıxış edən RİHBA-nın məsul işçisi Aidə Nağıyeva Daşkəsəndə özəl bölmənin inkişafı istiqamətində görülən işlər barədə ətraflı məlumat verib, digər dövlət dəstəyi mexanizmləri kimi, “KOB Dostu”nun da rayonda sahibkarlıq fəaliyyətinin genişlənməsinə töhfə verəcəyinə diqqət çəkib.
Daşkəsən KOB dostu Muraz Məmmədov təqdimatında Agentliyin çoxşaxəli fəaliyyəti, dəstək məqsədilə həyata keçirilən tədbirlər, o cümlədən “KOB Dostu” mexanizmi barədə söz açıb, sahibkarları və gəncləri maraqlandıran məsələlərlə bağlı ətraflı müzakirə aparıb. Yeni biznes sahələrinin yaradılmasında, sahibkarlıq fəaliyyətinin daha da genişləndirilməsində, maraqlarının müdafiəsi baxımından sahibkarlara dəstək və xidmət göstərən müvafiq dövlət qurumları ilə qarşılıqlı fəaliyyətinin vacibliyini vurğulayan Muraz Məmmədov çıxışının sonunda mövzu ilə bağlı sualları cavablandırıb.
Sonra sahibkarlar dinlənilib, müraciətləri qeydə alınıb, tövsiyələr verilib və məlumatlandırıcı bukletlər paylanıb.
Daşkəsən KOB dostu Muraz Məmmədov müvafiq dəstək göstərilməsi ilə bağlı müraciət edən vətəndaşların təsərrüfatlarına yerində baxış keçirib.
Elmar Əliyev-Vüqarlı
Daşkəsən RİHBA-nın İctimai-siyasi və
humanitar məsələlər şöbəsinin müdir müavini
