DAŞKƏSƏN RAYON İCRA HAKİMİYYƏTİNİN BAŞÇISI ƏHƏD ABIYEV RAYONUN QUŞÇU KƏNDİNDƏ SAKİNLƏRİN NÖVBƏTİ SƏYYAR QƏBULUNU KEÇİRMİŞDİR

Daşkəsən Rayon İcra Hakimiyyətinin Başçısı Əhəd Abıyevin müntəzəm olaraq yerlərdə əhali ilə səyyar qəbul və görüşlər keçirməsi rayonun inkişafına, mövcud problemlərin vaxtında aşkarlayıb operativ surətdə həll edilməsinə öz müsbət təsirini göstərir, sakinlərin böyük razılığına səbəb olur.
Belə görüşlərdən biri də martın 14-də rayonun Quşçu kəndində keçirilib. Görüşdə Rayon İcra Hakimiyyətinin Başçısı Əhəd Abıyev, rayonun hüquq-mühafizə orqanlarının, səhiyyə, təhsil, mədəniyyət, digər xidmət təşkilatlarının rəhbərləri və kənd sakinləri iştirak ediblər.
Daşkəsən Rayon İcra Hakimiyyətinin Başçısı  Əhəd Abıyev çıxışında Quşçu kənd sakinləri ilə dəfələrlə görüşdüyünü və həmin görüşlərdə qaldırılan məsələlərin həlli istiqamətində mühüm işlərin görüldüyünü bildirmişdir. Qeyd etmişdir ki, ötən dövrlərdə kənddə tam müasir tələblərə cavab verən yeni məktəb binası tikilmiş, uşaq bağçası əsaslı təmir edilmiş, abadlıq işləri aparılmış, əhalinin içməli su və elektrik enerjisi ilə fasiləsiz təmin olunması sahəsində mövcud olan problemlər aradan qaldırılmışdır.
Əhəd Abıyev çıxışında xüsusilə vurğulamışdır ki, möhtərəm Prezidentimiz cənab İlham Əliyev 2018-ci ildə Azərbaycanda qazlaşdırılacaq yaşayış məntəqələrinin siyahısını təsdiq edib. Həmin siyahıda Daşkəsən rayonu üzrə 2 yaşayış məntəqəsinin, o cümlədən 2 mindən çox əhalinin yaşadığı Quşçu kəndinin də qazlaşdırılması nəzərdə tutulub. Kənd sakinləri ölkə Rəhbərinin bu qayğısını böyük sevinclə qarşılayıblar.   
Görüş zamanı kənd sakinlərinin müxtəlif məsələlər barədə müraciətləri qeydə alınıb.
  Müraciətlər kənd ərazisində olan nasaz elektrik dayaqlarının dəyişdirilməsi, kəndarası yolların təmiri, yaxınlarının müalicəsihə kömək edilməsi, işlə təmin olunma və digər məsələlər ilə bağlı olub.
Daşkəsən Rayon İcra Hakimiyyətinin Başçısı Əhəd Abıyev qaldırılan məsələlərin icrası ilə əlaqədar aidiyyəti idarə, müəssisə və təşkilatların rəhbərlərinə öz müvafiq tapşırıqlarını verib.
Görüşdə çıxış edən kənd sakinləri  onlara göstərilən diqqət və qayğını yüksək qiymətləndirərək möhtərəm Prezident cənab İlham Əliyevə minnətdarlıqlarını ifadə ediblər.

Elmar Vüqarlı
Azərbaycan Yazıçılar Birliyinin üzvü