Daşkəsəndə Vətən Müharibəsi Şəhidi Rüfət Sadıqovun ad günü qeyd edilib

Noyabrın 13-də Daşkəsən rayon Quşçu kəndi sakini, İkinci Qarabağ müharibəsində şəhidlik zirvəsinə yüksələn çavuş Sadıqov Rüfət Vaqif oğlunun ad günü Şəhidin Daşkəsən Şəhidlər Xiyabanında məzarı önündə Daşkəsən rayon İcra hakimiyyəti başçısı aparatının işçiləri, hüquq-mühafizə orqanları, şəhidin ailə üzvləri, kənd sakinləri, rayonunun şəhid anaları, qazilər və ictimaiyyət nümayəndələri ilə birlikdə qeyd olunub.
   Əvvəlcə Şəhidin xatirəsi yad edilib, məzarı üzərinə gül dəstələri düzülüb, Ruhuna dualar oxunub.
Rayon İcra Hakimiyyəti başçısının müavini Vüqar Məmmədov Şəhidin ailəsinə Daşkəsən rayon İcra hakimiyyətinin başçısı Əhəd Abıyevin və rayon ictimaiyyətinin adından baş sağlığı verərək, Müzəffər Ali Baş Komandan cənab İlham Əliyevin rəhbərliyi altında 44 günlük Vətən Müharibəsində əldə olunan tarixi zəfərdən, Azərbaycan Ordusunun qüdrətindən və şəhid Rüfət Sadıqovun həyat və döyüş yolundan danışıb.
  Qeyd edək ki, Sadıqov Rüfət Vaqif oğlu 13 noyabr 1995-ci ildə Daşkəsən rayonu Quşçu kəndində doğulub. 2013-cü ildə Quşçu kənd Əli İsmayılov adına tam orta məktəbi bitirib. 2016-cı ildə müddətdən artıq həqiqi hərbi xidmət hərbi qulluqçusu kimi N hərbi hissəsində xidmətə başlayıb. Xidmət müddətində dəfələrlə fəxri fərmanlarla təltif olunub. Rüfət Sadıqov Vətən Müharibəsində 4 oktyabr 2020-ci ildə Kəlbəcər uğrunda gedən döyüşlərdə şəhadətə yüksəlib. Nəşi tapılaraq 19 dekabr 2020-ci ildə Daşkəsən Şəhidlər xiyabanında dəfn edilib. Prezident cənab İlham Əliyevin sərəncamları ilə Şəhid Rüfət Sadıqov hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün “Vətən uğrunda” və “Kəlbəcərin azad olunmasına görə” medalları ilə təltif edilib.
Mərasimdə SHXÇDX-nin Daşkəsən rayon bölməsi tərəfindən Şəhidin “Vətən uğrunda” medalı anası Tərifə Ağacanova təqdim olunub. 
Şəhidin anası Tərifə Ağacanova ailəsinə göstərilən diqqət və qayğıya görə ölkə başçısı cənab İlham Əliyevə və Birinci vitse-prezident hörmətli Mehriban xanım Əliyevaya minnətdarlığını bildirib.

Elmar Əliyev – Vüqarlı
Daşkəsən RİHBA-nın İctimai-siyasi və
humanitar məsələlər şöbəsinin müdir müavini