YENİ AZƏRBAYCAN PARTİYASI DAŞKƏSƏN RAYON TƏŞKİLATININ X HESABAT KONFRANSI KEÇİRİLİB

Avqustun 6-da YAP Daşkəsən rayon təşkilatının videoformatda X hesabat konfransı keçirilib.

Konfrans iştirakçıları  əvvəlcə Daşkəsən şəhərinin mərkəzində ulu öndər Heydər Əliyevin abidəsi önünə gül dəstələri düzüb, xatirəsini ehtiramla yad ediblər.
Ulu öndər Heydər Əliyevin abidəsi önündə bir qrup gənclə görüş keçirilib. Həmin gənc YAP fəallarına Partiyanın üzvlük vəsiqələri təqdim olunub. Vəsiqə alan gənclər dövlətə sədaqətli olduqlarını və ölkə Prezidentinin apardığı siyasəti dəstəklədiklərini bəyan ediblər.
Videoformatda keçirilən konfransda öncə YAP-ın yaradıcısı, ulu öndər Heydər Əliyevin və Azərbaycanın ərazi bütövlüyü uğrunda şəhid olan Vətən oğullarının əziz xatirəsi bir dəqiqəlik sükutla yad edilib.
Konfransın gündəliyi təsdiq edildikdən sonra YAP Daşkəsən rayon təşkilatının sədri Meydanəli Yolçuyev hesabat məruzəsi ilə çıxış edib. M.Yolçuyev bildirib ki, hazırda rayon təşkilatı 70 ərazi ilk partiya təşkilatında 4700 partiya üzvünü birləşdirir. Onlardan 2000 nəfəri qadın, 1000 nəfəri isə gənclərdir. IX konfransdan keçən müddət ərzində 427 nəfər partiya sıralarına qəbul olunub.
M.Yolçuyev hesabat dövrü ərzində keçirilən tədbirlərdən bəhs edərək bildirib ki, məqsəd hər bir tarixi hadisənin əhəmiyyətini bugünkü və gələcək nəsillərə çatdırmaqdır. Müasir müstəqil Azərbaycan dövlətinin qurucusu, ulu öndər Heydər Əliyevin düşünülmüş və bu günümüz üçün müəyyənləşdirilən siyasətinin təməlində azərbaycançılıq ideologiyası dayanır. Kimliyindən, harada yaşamasından, siyasi mənsubiyyətindən asılı olmayaraq hər kəs Vətəninə, torpağına bağlı olmalıdır. Necə ki xalqımız 44 günlük Vətən müharibəsi dövründə dünyaya dəmir yumruq kimi birliyimizi, həmrəyliyimizi nümayiş etdirdi. Bu gün həmin birlik tarixi sahibinə qovuşan Qarabağımızda bərpa və quruculuq işlərində özünü nümayiş etdirir.
Sonra YAP Daşkəsən rayon təşkilatının Nəzarət-Təftiş Qrupunun sədri Yaşar Məhərrəmovun hesabatı dinlənilib.
Müzakirələr zamanı YAP İdarə Heyətinin üzvü, Milli Məclisin deputatı Elşad Mirbəşiroğlu, rayon təşkilatının sədr müavini Namiq Süleymanov, rayon təşkilatı Qadınlar Şurasının sədri Rəna Aslanova, Daşkəsən rayon İcra hakimiyyəti aparatı ilk partiya təşkilatının sədri Malik Ələsgərov, YAP Daşkəsən rayon təşkilatı Gənclər Birliyinin İdarə Heyətinin üzvü Elşən Alıyev çıxış edərək təşkilatın hesabat dövrü ərzində gördüyü işlərdən bəhs ediblər.
Konfransda çıxış edən YAP Mərkəzi Aparatının Təşkilat şöbəsinin müdiri Əhliman Tağıyev bildirib ki, xalqımız ulu öndər Heydər Əliyevin yaradıcısı olduğu, son 18 ildə cənab İlham Əliyevin rəhbərlik etdiyi Yeni Azərbaycan Partiyasının uğurlu gələcəyinə böyük inam və etimad göstərir. Yeni Azərbaycan Partiyası Azərbaycanın, ümumilikdə regionun güclü siyasi təşkilatı kimi inkişaf etməklə bərabər, dünyanın qabaqcıl ölkələrinin aparıcı siyasi partiyalarının təcrübəsini də tətbiq edir. Fəaliyyətində beynəlxalq əməkdaşlığa xüsusi önəm verən Yeni Azərbaycan Partiyası bir çox ölkələrin hakim partiyaları ilə əməkdaşlıq edir.
Ə.Tağıyev ölkəmizin uğurlarında Yeni Azərbaycan Partiyasının böyük rolu olduğunu önə çəkərək, YAP  Daşkəsən  rayon təşkilatının gələcək fəaliyyətinə uğurlar arzulayıb.
Konfransda YAP Daşkəsən rayon təşkilatının hesabat dövrü ərzindəki fəaliyyəti qənaətbəxş qiymətləndirilib.

Elmar Əliyev –VÜQARLI
Daşkəsən RİHBA-nın İctimai-siyasi və
humanitar məsələlər şöbəsinin müdir müavini