Daşkəsəndə məktəblilərlə “Narkomaniya sağlam gələcəyin düşmənidir” mövzusunda maarifləndici görüş keçirilib
Martın 13-də Daşkəsən Rayon İcra Hakimiyyətinin, Daşkəsən Rayon Polis Şöbəsinin, rayon üzrə Gənclər və İdman Sektorunun və Təhsil Sektorunun birgə təşkilatçılığı ilə Daşkəsən rayonu Quşçu kənd Ə.İsmayılov adına tam orta ümumtəhsil məktəbində keçirilən növbəti maarifləndirici görüşdə Daşkəsən RİHBA-nın Hüquq şöbəsinin məsləhətçisi Əli İsmayılov, Daşkəsən Rayon Polis Şöbəsi rəisi, polis polkovniki Məhəmməd Əhmədbəyli, Gənclər və İdman Sektorunun baş məsləhətçisi Etibar Verdiyev, Təhsil Sektorunun əməkdaşı Mahmud Ələkbərov, məktəbin müəllimləri və yuxarı sinif şagirdləri iştirak ediblər.
Tədbirin məqsədi məktəbliləri narkomaniyanın zərərləri haqqında məlumatlandırmaq, onlara sağlam həyat tərzinin vacibliyini çatdırmaq, narkotik vasitələrdən və zərərli vərdişlərdən uzaq durmağı təşviq etmək olub.
Daşkəsən Rayon Polis Şöbəsinin rəisi, polis polkovniki Məhəmməd Əhmədbəyli çıxışında narkomaniyanın zərələri, ondan uzaq durmağın əhəmiyyəti, respublikamızda, o cümlədən Daşkəsən rayonunda narkomaniyaya qarşı aparılan tədbirlər barədə məlumat verib. Bildirib ki, xüsusilə yeniyetmə və gənclər üçün “ağ ölüm” adlandırılan bu bəlaya düçar olanlar daim mənəvi, tibbi, iqtisadi və sosial problemlər məngənəsində boğulurlar. Narkomaniyanın acı nəticəsi təkcə ölkələrə vurulan maddi və mənəvi zərərlə yox, milyonlarla insanın məhvi ilə ölçülür. Odur ki, insanların sağlamlığını və həyatını ciddi təhlükə altına alan, əxlaqi və mənəvi dəyərləri sarsıdan, insanlığa xələl gətirən, sosial-iqtisadi tərəqqini ləngidən, bir sözlə, həyatı iflic edən narkomanlığa münasibətdə hər birimiz barışmaz mövqe tutmalı və ümumbəşəri bəlaya qarşı qətiyyətli mübarizə aparmalıyıq.
Digər çıxışlarda vurğulanıb ki, narkomaniyaya qarşı mübarizənin daha faydalı olması üçün yeniyetmə və gənclərin antinarkomaniya ruhunda tərbiyə olunmasında valideynlərin, müəllimlərin və ziyalıların yaxından iştirak etməsi vacibdir. Bununla yanaşı, müxtəlif sahələri əhatə edən və gündəlik həyata asanlıqla tətbiq oluna bilən sağlam həyat tərzini təşviq edən fəaliyyətlər artırılmalıdır.
Sonda mövzu ətrafında müzakirə aparılıb, fikirlər dinlənilib, suallar cavablandırılıb və narkotikin fəsadlarından bəhs edən videoçarx nümayiş etdirilib.
