Daşkəsəndə “Konstitusiya və Suverenlik İli” çərçivəsində ağacəkmə aksiyaları davam edir

Aprelin 3-də Daşkəsən Rayon İcra Hakimiyyətinin təşkilatçılığı ilə “Konstitusiya və Suverenlik İli”nə həsr olunan növbəti ağacəkmə aksiyaları Daşkəsən şəhərində, Quşçu və Bayan kəndlərində keçirilib. Daşkəsən Rayon İcra Hakimiyyətinin başçısı Orxan Abbasov, məsul şəxslər, sakinlər, gənc könüllülər və ictimaiyyət fəalları aksiyalarda iştirak ediblər.

Rayonda ətraf mühitin mühafizəsi, yaşıllıq ərazilərinin genişləndirilməsi və ekoloji tarazlığın qorunması məqsədi daşıyan aksiyalar zamanı əsasən yerli iqlim şəraitinə uyğunlaşmış çoxsaylı meyvə və meşəcinsli ağaclar əkilərək suvarılıb, yeni yaşıllıq zolaqları salınıb.    

İcra başçısı Orxan Abbasov Daşkəsəndə keçirilən ağacəkmə aksiyaları ilə bağlı bildirib: “Prezident cənab İlham Əliyevin rəhbərliyi altında ölkəmizdə həyata keçirilən uğurlu ekoloji siyasət davamlı inkişafın və ekoloji tarazlığın qorunmasına yönəlmişdir. Genişmiqyaslı yaşıllaşdırma tədbirləri, ətraf mühitin mühafizəsi, meşə sahələrinin bərpası, su ehtiyatlarının qorunması, tullantıların idarəolunması, alternativ enerji mənbələrinin inkişafı, habelə ekoloji maarifləndirmə bu siyasətin prioritetləridir. Daşkəsəndə də böyük ruh yüksəkliyi ilə reallaşdırılan mütəşəkkil ağacəkmə aksiyaları həmin siyasətin tərkib hissəsidir. Rayonumuzun sakinləri bu təşəbbüsdə fəal iştirak edərək eyni zamanda ekoloji məsuliyyətlərini nümayiş etdirirlər”.