Daşkəsəndə 1 dekabr – Ümumdünya QİÇS-lə Mübarizə Gününə həsr olunmuş “Gəncliyimizi və gələcəyimizi qoruyaq” adlı tədbir keçirilib

Daşkəsən Rayon İcra Hakimiyyəti rayon üzrə Gənclər və İdman Sektoru, Təhsil Sektoru, mərkəzi rayon xəstəxanası publik hüquqi şəxsi ilə birgə Daşkəsən şəhər A.Mürsəlov adına 2 nömrəli tam orta məktəbdə 1 dekabr – Ümumdünya QİÇS-lə Mübarizə Gününə həsr edilmiş maarifləndirici tədbir təşkil edib.

“Gəncliyimizi və gələcəyimizi qoruyaq” adlı tədbirin məqsədi şagirdləri QİÇS, eləcə də narkomaniya və digər zərərli vərdişlərin fəsadları barədə məlumatlandırmaq, məktəblilərin təhsilə, elmə, idmana olan marağını artırmaqdan ibarətdir.

Müəllimlərin və yuxarı sinif şagirdlərinin iştirak etdiyi tədbirdə çıxış edənlər  şagirdlərə QİÇS xəstəliyinin yaranma səbəbləri, törətdiyi fəsadlar və ondan qorunma üsulları barədə ətraflı məlumat veriblər. Diqqətə çatdırılıb ki, QİÇS insanın immunçatışmazlığı virusu - HİV ilə yoluxması nəticəsində əmələ gəlir. Bu virus əsasən insanın xəstəliklərə müqavimətini təmin edən immun sistemini zədələyir. Nəticədə bu virusla yoluxan şəxsin bütün xəstəliklərə qarşı müqaviməti zəifləyir. Müəyyən müddətdən sonra virus insan orqanizminin müqavimətini tam məhv edir və o ən adi mikroorqanizmlər və bədxassəli şişlər qarşısında aciz qalır. QİÇS adlanan bu mərhələdə ən adi bir xəstəlik də çox ağır fəsadlara gətirib çıxararaq ölümlə nəticələnə bilir. Xəstəliyin yaş həddi yoxdur. Xəstəliyə yoluxmamaq üçün məlumatlı olmalı, xüsusən də müalicə alarkən, yaxud qan köçürülməsi, habelə steril olmayan tibbi alətlərdən, diş fırçası və üzqırxanlardan istifadə zamanı diqqətli və ehtiyatlı olmaq lazımdır.

Sonda şagirdlərin sualları cavablandırılıb.