Daşkəsən rayonunda “Konstitusiya və Suverenlik İli”nə həsr olunan ağacəkmə aksiyası keçirilib
Aprelin 1-də “Azərbaycan Respublikasında 2025-ci ilin “Konstitusiya və Suverenlik İli” elan edilməsi ilə bağlı Tədbirlər Planı”na uyğun olaraq yaz mövsümündə Daşkəsən rayonu ərazisində ilk ağacəkmə aksiyası təşkil olunub.
Yuxarı Daşkəsən qəsəbəsində keçirilən aksiyada Daşkəsən Rayon İcra Hakimiyyətinin başçısı Orxan Abbasov, məsul şəxslər, könüllü gənclər və ictimaiyyət nümayəndələri iştirak ediblər. Yerli iqlim şəraitinə uyğun müxtəlif meyvə və meşəcinsli ağacların əkildiyi ərazilərdə abadlıq işləri aparılıb və aqrotexniki qulluq göstərilib. Həmçinin qurumuş ağaclar çıxarılaraq yeniləri ilə əvəzlənib.
İcra başçısı Orxan Abbasov ağacəkmə aksiyasında bildirib ki, Daşkəsən rayonunda mütəmadi olaraq müxtəlif ekoloji aksiyaların təşkil edilməsinin məqsədi yaşıllıq sahələrinin qorunmasının və artırılmasının təşviqi, ətraf mühitin mühafizəsi, ekoloji təhlükəsizliyin təmini və iqlim dəyişikliyi ilə mübarizə tədbirlərinə töhfə verməkdən ibarətdir.
