Daşkəsən Rayon İcra Hakimiyyətinin başçısı Orxan Abbasov 02.04.2025-ci il tarixdə Qıyıqlı və Dəstəfur kəndləri sakinlərinin səyyar qəbulunu keçirib
Aprelin 2-də Daşkəsən Rayon İcra Hakimiyyətinin başçısı Orxan Abbasovun Dəstəfur kəndində keçirilən səyyar qəbulunda rayonun hüquq-mühafizə orqanlarının, habelə idarə, müəssisə, xidmət sahələrinin rəhbərləri, ərazi icra nümayəndəsi, bələdiyyə sədri, Qıyıqlı və Dəstəfur kəndlərinin sakinləri iştirak ediblər.
İcra başçısı Orxan Abbasov giriş nitqində Prezident cənab İlham Əliyevin rəhbərliyi ilə Daşkəsən rayonunun bütün sahələrində davamlı inkişafın olduğunu və sakinlərin rifahının daha da yaxşılaşdırılması istiqamətində məqsədyönlü tədbirlərin mütəmadi həyata keçirildiyini diqqətə çatdırıb. Ötən dövrlərdə Dəstəfur inzibati ərazi vahidliyində görülmüş işlərdən danışan Orxan Abbasov eyni zamanda ərazidə həlli vacib olan sosial məsələlərə də toxunub. Vurğulayıb ki, Daşkəsən-Dəstəfur-Qıyıqlı avtomobil yolunun asfaltlanması və qazlaşdırma ilə bağlı artıq aidiyyəti üzrə müraciətlər olunmuşdur.
Sonra sakinlərin müraciət və təklifləri dinlənilib. İcra başçısı Orxan Abbasov səsləndirilən müraciətlərə dair müvafiq qurumlara tapşırıq və tövsiyələrini verib. Bəzi müraciətlərin yerində həlli təmin edilib. Əlavə araşdırma tələb edən müraciətlər isə nəzarət qaydasında qeydiyyata götürülüb.
Yerlərdə vətəndaşlarla görüşlərin problemlərin öyrənilməsində və operativ həllində geniş imkan yaratdığını qeyd edən sakinlər onlara hər zaman göstərilən diqqət və qayğıya görə Prezident cənab İlham Əliyevə və Birinci vitse-prezident hörmətli Mehriban xanım Əliyevaya minnətdarlıqlarını bildiriblər.
