22 fevral – Azərbaycan Respublikası avtomobil yol işçilərinin peşə bayramıdır
Azərbaycan Respublikasının Prezidenti cənab İlham Əliyevin 2008-ci il fevralın 20-də imzaladığı “Azərbaycan Respublikası avtomobil yol işçilərinin peşə bayramının təsis edilməsi haqqında” Sərəncamından sonra hər il bu tarix avtomobil yolları işçilərinin peşə bayramı kimi qeyd olunur. Bu əlamətdar gün ölkənin yol infrastrukturu sahəsində çalışan minlərlə insanın fədakar əməyinə verilən dəyərin bir ifadəsidir.
Azəbaycan avtomobil yollarının inkişafı uzun bir tarixə malikdir. Xüsusilə müstəqillik dövründə Ulu Öndər Heydər Əliyevin müəyyən etdiyi inkişaf strategiyasının mühüm tərkib hissəsi kimi yol-nəqliyyat infrastrukturunun yenidən qurulması ölkəmizin sosial-iqtisadi inkişafının əsas istiqamətlərindən birinə çevrilib. Ulu Öndər Heydər Əliyevin layiqli siyasi varisi Prezident cənab İlham Əliyevin rəhbərliyi altında hazırda yol-nəqliyyat infrastrukturu ölkəmizin əsas inkişaf prioritetlərindən biri kimi formalaşıb. Son illərdə beynəlxalq standartlara cavab verən avtomobil yollarının tikintisi, mövcud yolların genişləndirilməsi və müasir nəqliyyat qovşaqlarının yaradılması sahəsində mühüm layihələr həyata keçirilib.
Prezident cənab İlham Əliyevin imzaladığı bir sıra dövlət proqramları və sərəncamlar nəticəsində Azərbaycan avtomobil yolları şəbəkəsi beynəlxalq standartlara uyğun müasir və təhlükəsiz magistrallarla əhatə olunub. Bu çərçivədə ölkədə 10 min kilometrlərlə yeni avtomobil yolları, körpülər, tunellər, yol qovşaqları tikilib və yenidən qurulub.
Hər bir ölkənin sosial-iqtisadi inkişafında mühüm komponent olan yol-nəqliyyat infrastrukturu Azərbaycan üçün də regional inkişafı sürətləndirmək, daxili və beynəlxalq logistikanı gücləndirmək baxımından vacibdir.
Prezident cənab İlham Əliyevin nəqliyyat strategiyası çərçivəsində respublika əhəmiyyətli Bakı-Quba-Rusiya, Bakı-Qazax-Gürcüstan, Bakı-Ələt-Astara-İran, Bakı dairəvi avtomobil yolları və digər daxili yollar yenidən çəkilmişdir.
Azərbaycanın coğrafi mövqeyi ölkəmizi beynəlxalq nəqliyyat-logistika mərkəzlərindən birinə çevirmək üçün əlverişlidir. Bu istiqamətdə Bakı-Tbilisi-Qars dəmir və avtomobil yolları, Şimal-Cənub nəqliyyat dəhlizi və Şərq-Qərb dəhlizi kimi beynəlxalq layihələr artıq reallaşdırılmışdır.
Hazırda Qarabağ və Şərqi Zəngəzurda yol infrastrukturunun yenidən qurulması və genişləndirilməsi xüsusi əhəmiyyət daşıyır. Füzulidən Şuşaya çəkilmiş Zəfər Yolu, Füzuli-Hadrut, Laçın-Kəlbəcər, Bərdə-Ağdam, Horadiz-Cəbrayıl-Zəngilan-Ağbənd və digər yollar, o cümlədən Azərbaycanın qərb rayonlarını Naxçıvanla birləşdirəcək Zəngəzur dəhlizi ölkəmizin iqtisadi inkişafını sürətləndirən, regional əlaqələri və beynəlxalq tranzit imkanlarını gücləndirən mühüm strateji istiqamətlərdir.
Prezident cənab İlham Əliyevin rəhbərliyi altında yol infrastrukturu sahəsində avtomobil yollarının keyfiyyətinin artırılması, yeni texnologiyaların tətbiqi, rəqəmsal nəqliyyat idarəetmə sistemlərinin inkişafı, yaşıl enerji konsepsiyası çərçivəsində ekoloji cəhətdən təmiz yolların qurulması gələcək perspektivlər və hədəflər olaraq müəyyən edilib.
Azərbaycan avtomobil yolları işçiləri ölkəmizin nəqliyyat sisteminin əsas dayağıdır. Azərbaycan Avtomobil Yolları Dövlət Agentliyi ölkənin ümumi istifadədə olan respublika və yerli əhəmiyyətli avtomobil yollarının, körpülərin, tunellərin və yol qurğularının, həmçinin Bakı şəhərinin avtomobil yollarının, prospektlərin və küçələrin vəziyyətinə nəzarətin həyata keçirilməsi, qorunub-saxlanılması, layihələndirilməsi, tikilməsi, cari, orta və əsaslı təmiri və bərpası işlərini yerinə yetirir. Onların fəaliyyəti sayəsində yolların keyfiyyəti artır, yol infrastrukturunun saxlanması, təhlükəsizliyi təmin olunur. Avtomobil yolları işçiləri respublikamızın hər guşəsində vətəndaşların rahat və təhlükəsiz hərəkət etməsi üçün istənilən hava şəraitində yorulmadan çalışır, güclü və müasir nəqliyyat şəbəkəsinin qurulmasına xidmət göstərir.
22 fevral – Azərbaycan Respublikası avtomobil yol işçilərinin peşə bayramı günü münasibətilə bütün avtomobil yol işçilərini təbrik edir, onlara möhkəm cansağlığı və işlərində yeni uğurlar arzulayırıq.
