Şəhid Cabbarov Muraz İlham oğlunun və Şıxıyev Orxan Raqif oğlunun anım günləri qeyd olunub.
Daşkəsən Şəhidlər Xiyabanında şəhid Cabbarov Muraz İlham oğlunun və Şıxıyev Orxan Raqif oğlunun anım günləri qeyd olunub.
Anım günü mərasimində Rayon İcra Hakimiyyətinin, hüquq-mühafizə orqanlarının rəhbər və məsul şəxsləri, rayon ictimaiyyətinin nümayəndələri, şəhid valideynləri, qazilər və şəhidin ailə üzvləri iştirak etmişlər.
Əvvəlcə şəhidlərin məzarı üzərinə gül dəstələri düzülüb, əziz ruhlarına dualar oxunub.
Daşkəsən Rayon İcra Hakimiyyəti Başçısının səlahiyyətlərini müvəqqəti icra edən Vüqar Məmmədov şəhid ailələri görüşüb, onların problemləri və qayğıları ilə maraqlanıb.
Sonra Vüqar Məmmədov anım mərasimi iştirakçıları qarşısında çıxış edərək 44 günlük Vətən müharibəsində qəhrəman Azərbaycan oğullarının döyüşlərdə göstərdiyi sücaətlərdən söhbət açıb, hər birinin qısa, lakin mənalı ömür yolunun gənclərə örnək olduğunu bildirib. Müzəffər Ali Baş Komandan cənab İlham Əliyevin rəhbərliyi altında əsgər və zabitlərin qəhrəmanlığı, şücaəti sayəsində torpaqlarımızın işğaldan azad olunduğunu, belə igid, vətənpərvər oğullar böyütdükləri üçün şəhid valideyinləri qarşısında baş əydiyini bildirib. Qazanılan tarixi zəfərdən sonra işğaldan azad olunmuş torpaqlarda aparılan böyük quruculuq işlərindən söhbət açıb.
Ölkə rəhbəri cənab İlham Əliyev və Birinci vitse-prezident Mehriban xanım Əliyeva tərəfindən hər zaman şəhid ailələrinə yüksək diqqət və qayğı göstərildiyini, şəhid ailə üzvlərinin, qazilərin və müharibə iştirakçılarının problemlərinə hər kəsin həssaslıqla yanaşdığını bildirib.
Sonra ehsan süfrəsi açılıb.
Qeyd edək ki, Cabbarov Muraz İlham oğlu 2000-ci il martın 7-də Daşkəsən rayonunun Zağalı kəndində anadan olub. 2018-ci ildə hərbi xidmətə başlayan Muraz Cabbarov xidmətini Xüsusi Təyinatlı Qüvvələrdə davam etmişdir. 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Muraz Cabbarov Füzuli və Kəlbəcər döyüşlərində vuruşub. 10 oktyabr 2020-ci ildə Füzuli istiqamətində gedən döyüşlər zamanı şəhid olmuşdur. 2 noyabr 2020-ci il tarixdə Daşkəsən Şəhidlər Xiyabanında dəfn edilib. Subay idi.
Azərbaycan Respublikasının Prezidenti cənab İlham Əliyevin sərəncamlarına əsasən ölümündən sonra 3-cü dərəcəli "Rəşadət” ordeni və ”Cəsur döyüşçü”, “Vətən uğrunda”, ”Kəlbəcərin azad olunmasına görə", ”Füzulinin azad olunmasına görə" medalları ilə təltif edilmişdir.
Şıxıyev Orxan Raqif oğlu 1989-cu il sentyabrın 29-da Daşkəsən rayonunun Dəstəfur kəndində anadan olub. Vətən müharibəsi zamanı Şuşanın azadlığı uğrunda gedən döyüşlər zamanı şəhid olub. 02.11.2020-ci il tarixdə Daşkəsən Şəhidlər Xiyabanında dəfn edilib. Ailəli idi.
Azərbaycan Respublikasının Prezidenti cənab İlham Əliyevin sərəncamlarına əsasən ölümündən sonra “Vətən uğrunda” və ”Xocavəndin azad olunmasına görə" medalları ilə təltif edilmişdir.
Şəhidlərin ailə üzvləri onlara göstərilən diqqət və qayğıya görə Azərbaycan Respublikası Prezidenti cənab İlham Əliyevə və Birinci vitse-prezident Mehriban xanım Əliyevaya öz minnnətdarlıqlarını bildiriblər.
