Daşkəsəndə “Heydər Əliyev İli”nə həsr olunan minifutbol birinciliyini keçirilib

25-26 oktyabr tarixlərində Daşkəsən Rayon İcra Hakimiyyətinin, Gənclər və İdman Sektorunun, Təhsil Sektorunun və Uşaq, Gənclər İdman, Şahmat məktəbinin birgə təşkilatçılığı ilə "Heydər Əliyev İli" çərçivəsində təsdiq olunmuş Tədbirlər Planına uyğun olaraq ümumtəhsil məktəblərinin oğlanlarından ibarət komandaları arasında minifutbol üzrə rayon birinciliyi keçirilib.

6 komandanın iştirak etdiyi birinciliyin əsas məqsədi Ulu Öndər Heydər Əliyevin zəngin dövlətçilik irsinin təbliği ilə yanaşı, rayonun ümumtəhsil məktəblərində təhsil alan gənclərin idmana, sağlam həyat tərzinə marağının artırılması, minifutbol idman növünün təşviqi, həmçinin məktəblər arasında dostluq əlaqələrinin möhkəmlənməsinə töhfə verilməsi olub.

 “Daşkəsən Dəmir Filiz” MMC-nin minifutbol meydançasında keçirilən yarışın açılış hissəsində Ümummilli Lider Heydər Əliyevin və torpaqlarımızın azadlığı uğrunda canlarından keçən şəhidlərimizin əziz xatirəsi anılıb.

Çıxış edənlər Azərbaycan xalqının Ümummilli Lideri Heydər Əliyevin anadan olmasının 100-cü ildönümünə həsr olunmuş birinciliyin əhəmiyyətindən söz açaraq Ulu Öndər tərəfindən əsası qoyulmuş idman siyasətinin uğurla inkişafından bəhs ediblər.

Gərgin mübarizə şəraitində başa çatan minifutbol yarışında Daşkəsən şəhər İ.Nəsimi adına 1 nömrəli tam orta məktəbin komandası 1-ci, S.Vurğun adına 4 nömrəli tam orta məktəbin komandası 2-ci, A.Mürsəlov adına 2 nömrəli tam orta məktəbin komandası 3-cü yerə çıxıb.

Qalib gəlmiş komandalar diplom və kubokla mükafatlandırılıblar.