DAŞKƏSƏNDƏ GÜCLÜ DOLU VƏ LEYSAN YAĞIŞLARI BÖYÜK ZİYANLAR VURUB
İyunun 27-si saat 11:00 radələrində Daşkəsən rayonu ərazisinə yağan güclü dolu və leysan yağışları qısa müddət ərzində Daşkəsən şəhərində əksər istinad divarlarını dağıdıb, yol infrastrukturunu, bəzi elektrik və rabitə xətlərini qırıb, sel suları bir çox fərdi yaşayış evlərinin bünövrəsini uçurub, rayonun Çovdar, Astaf, Qabaqtəpə, Əmirvar, Bayan, Çanaqçı, Quşçu, Alaxançallı və Qaraqullar kəndlərində yollara, fərdi yaşayış evlərinə, təsərrüfatlara ciddi ziyan dəyib. Daşkəsən şəhərinin mərkəzi küçəsindən güclü sel keçir. Kənd ərazilərində dağlardan iri qaya parçaları və palçıq kütləsi avtomobil yollarına töküldüyündən bəzi yollarda nəqliyyatın hərəkəti dayanıb. Hazırda Daşkəsən Rayon İcra Hakimiyyəti tərəfindən dəymiş ziyanların aradan qaldırılması davam etdirilir.
Əsəd Yusifov
Daşkəsən RİHBA-nın İnformasiya təminatı və
təhlil sektorunun müdiri
