DAŞKƏSƏN RAYON İCRA HAKİMİYYƏTİNİN BAŞÇISI ƏHƏD ABIYEV QARATAĞLAR KƏNDİNDƏ VƏTƏNDAŞLARIN NÖVBƏTİ SƏYYAR QƏBULUNU KEÇİRİB

Daşkəsən Rayon İcra Hakimiyyətinin Başçısı Əhəd Abıyev təsdiq edilmiş qrafikə uyğun olaraq sentyabrın 25-də ucqar dağ ətəyində yerləşən Qaratağlar kəndində vətəndaşların növbəti səyyar qəbulunu keçirib.
Daşkəsən Rayon İcra Hakimiyyətinin Başçısı Əhəd Abıyev səyyar qəbulda çıxış edərək  bildirmişdir ki, bu gün Rayon İcra Hakimiyyətinin məsul işçilərinin, rayonun hüquq-mühafizə orqanlarının, idarə, müəssisə və təşkilat rəhbərlərinin iştirakı ilə yerlərdə keçirilən səyyar qəbulların qrafikinə uyğun olaraq kənd sakinləri ilə görüşə gəlmişik.
Azərbaycan Respublikasının Prezidenti cənab İlham Əliyev tərəfindən ölkə əhalisini narahat edən sosial məsələlərin həlli daim diqqət mərkəzində saxlanılır, ölkədə həyata keçirilən dövlət siyasətinin mərkəzində vətəndaşlarımızın rahatlığı və sosial vəziyyətinin yaxşılaşdırılması dayanır.
Görüşümüzün də əsas məqsədi siz kənd sakinlərini narahat edən məsələləri öz dilinizdən eşitmək və Rayon İcra Hakimiyyəti tərəfindən bu problemlərin vaxtında həlli üçün lazım olan bütün addımları atmaqdır.
Bu gün sosial sahələrin inkişafı, əhalini narahat edən problemlərin yerində həlli məqsədi ilə yerlərdə keçirilən səyyar qəbullar Azərbaycan Respublikası Prezidentinin Administrasiyasının diqqət mərkəzindədir və səsləndirdiyiniz müraciətlər nəzarət qaydasında icra olunur. 
Yerində həlli mümkün olan məsələlər operativ şəkildə həll ediləcək, lazım gəldiyi halda isə aidiyyəti üzrə baş idarə və nazirliklər qarşısında məsələ qaldırılaraq həll edilir.
Rayon İcra Hakimiyyətinin Başçısı Əhəd Abıyev əhalinin sosial müdafiəsinə və rifah halının yüksəldilməsinə yönəldilmiş qərarlar, eyni zamanda, problemli kreditlər sahəsində vətəndaşların maliyyə yükünün azaldılması və müavinətlərin artırılması istiqamətində həyata keçirilən tədbirlər barədə Qaratağlar kənd sakinlərinə ətraflı məlumat verib.
Xüsusilə vurğulamışdır ki, Azərbaycan Respublikasının möhtərəm Prezidenti cənab İlham Əliyev tərəfindən çox uğurla aparılan siyasətin təməlində xalqa xidmət dayanır.
Sentyabr ayından  minimum əməkhaqqı 250 manata çatdırılıb. Bütün mərkəzi və yerli dövlət orqanlarının, hərbi qulluqçuların, eləcə də digər büdcə təşkilatları işçilərinin əməkhaqlarının 40 faiz artırılmasının başlıca səbəbi vətəndaşlarımızın sosial rifahının yaxşılaşdırılması istiqamətində aparılan çox uğurlu islahatlardır.
Əhəd Abıyev bildirdi ki, Azərbaycanın müstəqilliyi, ərazi bütövlüyü, suverenliyi, hakimiyyətin xalq iradəsi ilə formalaşdırılması, Azərbaycanın demokratik-hüquqi dövlət olması, vətəndaş cəmiyyətinin fəaliyyətinə təminat verilməsi, sosial dövlətin və əhalinin rifahının təmin edilməsi, eləcə də ümumbəşəri dəyərlər Azərbaycan xalqını birləşdirən ümumi dəyərlərdir.
Məhz buna görə də sizlərin hər birini ölkə rəhbərimizin  ətrafında həmişə olduğu kimi daha da sıx birləşməyə, ölkəmizdəki əmin-amanlığı, sabitliyi qorumağa, müasir müstəqil Azərbaycanımızın qüdrətlənməsi naminə  möhtərəm Prezidentimiz  cənab İlham Əliyevin uğurla həyata keçirdiyi işlərə hər zaman dəstək olmağa çağırıram.
Rayonumuzun inkişafına göstərdiyi diqqət və qayğıya görə  ölkə rəhbərimizə hər birimizin adından dərin minnətdarlığımızı və təşəkkürümüzü bildiririk.
Daha sonra Rayon İcra Hakimiyyətinin Başçısı Əhəd Abıyev sakinlərin müraciətlərini dinləyib.
Səyyar qəbulda sakinlərin müraciəti əsasən kənd ərazisində olan istismara yararsız vəziyyətə düşmüş elektrik dirəklərinin və naqillərinin dəyişdirilməsi, kəndə təbii qaz xəttinin çəkilməsi, yolun təmiri, işlə təmin olunma və digər məsələlərlə bağlı olub.
Hər bir sakinin probleminə diqqətlə yanaşan Əhəd Abıyev vətəndaşların müraciətlərinin araşdırılması və qaldırılan məsələlərin qanunvericiliyin tələblərinə uyğun olaraq həllinə dair aidiyyəti qurumların rəhbərlərinə tapşırıqlar verib.
Sakinlər tərəfindən qaldırılan məsələlərin  əksəriyyəti Rayon İcra Hakimiyyətinin Başçısı Əhəd Abıyevin müvafiq göstərişi ilə  yerindəcə həll edilib, bəzi müraciətlərlə bağlı isə aidiyyəti qurumlara tezliklə qısa müddət ərzində həll edilməsi tapşırılıb.
Sakinlər onların müraciətlərinə baxılması üçün yaradılan yüksək şəraitdən razılıq edərək göstərdiyi diqqət və qayğıya görə möhtərəm Prezident cənab İlham Əliyevə minnətdarlıqlarını bildiriblər.
Qəbulun sonunda Yeni Azərbaycan Partiyasının sıralarına  yeni qəbul olunmuş bir qrup kənd sakininə partiyanın üzvlük vəsiqələri təqdim edilib. Yeni üzvlər birmənalı olaraq bildiriblər ki, bu gün onların həyatında çox əlamətdar hadisə kimi qalacaq. İnkişaf və müasirlik partiyası olan Yeni Azərbaycan Partiyasının üzvü olmaq böyük məsuliyyət və şərəfdir.

Elmar ƏLİYEV
RİHBA-nın İctimai-siyasi və humanitar məsələlər
şöbəsinin müdir müavini – dini qurumlarla işin təşkilatçısı